حلبة بحليب

الصبح شقشق راح مصبح ع الكراسى
والراديو بيغنى بصوت عاقل و راسى
جه لأسطى سيد لسة ما طلعش ل طريقه
نازل و متسربع ونفسه يشق ريقه
نادى بصوت مبحوح و قال ...
حلبة بحليب

الزهر نط ... وتاه ما بين الكبايات
وقطط بتتخبى ف ضل الترابيزات
والدمنا قفلت ... مطوة طلعت ...ناس تصوت
فضوا الخناقة والحساب ع الحج ثروت
عناب وقهوة ... وقص وشاى
من غير حليب

واحد على المدخل هناك يضرب حشيش
سريح بشنطة وجى يسعى لأكل عيش
معاه حلاوة وقصافات ... حنة و بخور
ومعاه حاجات ... قال اي تخلى النملة طور
جرب كده ...وصلى على
نور الحبيب

والكل ملهى ف دنيته ..ف السكة ماشى
سكة وتاه فيها البشر وسط المواشى
والقهوة تفضى وتتملى و انا ف مكانى
مستنى مين يجى ويقعد جنبى تانى
نشرب على روح الزمن ...
حلبة بحليب.