كادر المعلم (( الشمبونجى )) .

إعترافاً منها بدور مصر الرائد فى المنطقة وفى إطار الخطوات التى إتخذتها دولة (( شمبونجو )) الشقيقة للنهوض بالشعب الشومبونجى فى جميع المجالات وبخاصة مجال التعليم ، أعلن المتحدث الرسمى بإسم السفارة الشمبونجية فى خطاب رسمى بالسفارة فى القاهرة عن قيامهم بتعيين (( القرد اللى بيتكلم )) وزيرا للتربية والتعليم - فى شومبونجو –
والجدير بالذكر إن انتقال القرد اللى بيتكلم الى شمبونجو كان جزء من الصفقة التبادلية الأكبر فى تاريخ البلدين ، لما ادينالهم الشبكة القديمة ولبسنا احنا الشبكة الجديدة وأصر المسؤولون المصريون على إعطائهم القرد على اساس ان عندنا منه كتير واهى تبقى بجميلة برده .....!
وقد أظهر القرد ذكاء خارق مما حذى بالمسئوليين على تعيينه فى هذا المنصب الحساس ، وكمان القرد ما كدبش خبر وكان قد المسؤولية ، وكان أول شئ قام بيه أنه رتب دولاب الوزارة ، فحط الغيارات البيضة فى رف والبوكسرات الملونة فى رف تانى ، الأمر الذى كان يسبب البلبلة من قبل فى الأوساط العلمية – بشمبونجو طبعاً –
وإستكمالاً لخطته الطامحة للإرتفاع بمستوى التعليم قرر إن يبدأ بتنفيذ الكادر الجديد للمعلمين ، فعمل قعدة مع المعاونين ليه ، وخرج بعدة قرارات من ضمنها أن يتم عمل إمتحانات دورية لكل اللى عايز يدخل الكادر وهى امتحانات بسيطة فى الكمبيوتر و شوية لغات عبيطة كدة – عربى على ايطالى على هندى ... وكدة –
طب واللى ما ينجحش ؟ ..... ببساطة ما يدخلش ...!
ولما لقى أن الناس بتنفضلوا ، أتخذ خطوات أشد حدة فقرر عدم صرف بطاقة التموين لأى واحد ما دخلش الكادر – والذى يتكون من عدد 2 باكو شاى الفوازير ، وصوباتة موز مغربى (( من أبو نقطة )) مستورد من الأسماعيلية –
كما قرر سحب الجنسية الشمبونجية من أى واحد يسقط فى الإمتحان اللى هيتعمل كل 5 سنين ، ولما سئلوه الناس اللى هتتسحب الجنسية منهم يروحوا فين ...
رد ببساطة بأنهم يدورولهم على بلد تانى على اساس أنه وهو مال أمه بيهم ... ما يولعوا .....
ورداً على الحملة التى تنادى بعودة القرد لمصر قال : ماهى مصر مليانة ، ولا هو قطع أرزاق وخلاص .... !
وإلى أن نراكم فى رسالة أخرى نستودعكم الله ...
عمار يا شمبونجو ...